Кітапхана
Кітапхана
Колледж кітапханасы – колледждің құрамды бір бөлігі.Ол білімгерлердің білім үйрену негіздеріне көмектеседі, бағыттайды. Оқу-тәрбие жұмысына белсене араласуына ықпал жасайды. Балалардың кітапқа деген сүйіспеншілігін оятып, олардың оқуға деген талғамын қанағаттандырып отырады. Кітап оқуға құштарлығы бар оқушылардың жаңа ұжымын құрайды.
Колледж кітапханасы 2006 жылдан бастап оқырмандарға қызмет көрсетіп келеді.
Қазіргі таңдағы колледж кітапханасы – колледждің ақпараттық ресурсы оқу-білім үрдісінде ақпараттық технологияларды кеңінен пайдалануға ықпал етеді. Бұл іске жауапкершілікпен қарау – бүгінгі кітапхананың басты міндеті мен талабы.
Кітапханада 2018 жылдан бастап интернетті Wi-fi арқылы тарату іске қосылған. Колледжде yassaui_kolledj@mail.ru электронды поштасы және tayk.kz web - сайты қызмет етеді. Сайтта кітапхананың арнайы web – парағы ашылған. Web – парағынан кітапхана туралы барлық мәліметтерді тауып алуға болады.
Кітапхананың жалпы ауданы 133,6 м2. Колледж кітапханасында екі оқу залы бар: біріншісі - ең соңғы үлгімен жабдықталған интернет желісіне қосылған 22 моноблок, 22 орынға арналған электронды оқу залы, ал екіншісінде - колледжде оқытылатын барлық мамандықтарға қатысты пән оқулықтары мен әдеби кітаптар орналастырылған. Электронды оқу залында білім алушылар мен оқытушылардың сабаққа дайындалуларына және анықтамалық басылымдардың, сондай-ақ мерзімді басылымдардың бай қорын пайдалануға болады. Ал интернет желісіне қосылған компьютерлерді кез-келген оқырман шектеусіз пайдалануына мүмкіншілік жасалған. Сонымен бірге, кітапханадағы принтер, интерактивті тақта мен проектор колледжде өткізілетін барлық шаралар үшін қолданылады. Оқырмандар «Жаңа кітаптар» айдарымен арнайы ұйымдастырылатын көрмеден жаңа келген кітаптармен, әдістемелік жаңалықтармен, мерзімді басылымдармен таныса алады. Кітапханада оқушылар олимпиадаға, ғылыми-тәжірибелік конференцияларға дайындалу үшін кітаптарды және интернет желісін белсенді пайдаланады.
- Мақсаттары мен міндеттері:
- Оқырмандарға абонементте, оқу залында, электронды оқу залында сапалы да жылдам қызмет көрсетуді ұйымдастыру;
- Бүгінгі заман ағымына ілесе отырып, толыққанды ақпаратпен оқырман сұранысы мен талаптарын барынша қанағаттандыру;
- Оқырмандардың жұмыс істеуіне қажетті жағдай жасау;
- Кітапханалық және ақпараттық қызмет көрсетуді, кітаптарды насихаттауды, бұл мақсатта оқырмандармен жеке және жалпы жұмыстың түрлі формаларын қолдану, сондай-ақ компьютерлік технологияларды енгізу арқылы жетілдіру;
- Жаңа ғасырдағы жеке тұлғалардың қалыптасуына, адамзат баласының рухани дамуына, білімді ұрпақ тәрбиелеуге үлес қосу;
- Кітапханалық-библиографиялық білім негізінде әңгіме, ауызша кеңес беру арқылы оқырмандардың кітапханалық сауаттылығын, оқу мәдениетін көтеру;
- Кітапхананың кітап қорын бүгінгі күн талабына лайық деп саналатын маңызды, құнды басылымдармен толықтыру;
Кітапханада кітап қорын толықтыру және қорды сақтау
Колледж әкімшілігі кітапхана қорының сапалы және толық жабдықталуына аса көңіл бөледі. Кітап – білім нәрімен сусындатар сарқылмас қазына, рухани байлықтың қайнар көзі, рух дәрумені десек, кітапхананың кітап қорында бүгінде 24168 дана кітап бар, ал электрондық оқулықтардың саны – 632. Сонымен бірге, колледж оқушыларына университет кітапханасындағы кітап қорын толық пайдалануға мүмкіншілік жасалған.
Кітапхана қорын толықтыру мақсатында колледж кітапханасына «ФОЛИАНТ», «NURPRESS », «Қазақ университеті», «Мектеп», «Эверо», «Альманах» т.б. баспаларынан мемлекеттік сатып алу арқылы жаңа кітаптар жеткізіледі, сондай-ақ түрлі мекемелер мен жекелеген оқырмандардың сыйға тартқан кітаптарымен толықтырылып отырады. Биылғы жылдың бірінші жартысында «Қазақ университеті» баспасынан 153, «Эверо» баспасынан 565, «ФОЛИАНТ» баспасынан 172, «Альманах» баспасынан 435 кітап сатып алынды. Бүгінде қорды толықтыруда кітапхана жаңа үрдісті қолдануда – ол Интернет желісімен электрондық поштаны пайдалану арқылы ірі баспалар мен кітап-сауда орталықтарының Интернет-кітап дүкендеріне кіруге, бар ассортиментімен танысуға, қажет оқулықтардың тізімін арнайы циклдік пән төрайымдарына таратып, тапсырыс беруге мүмкіндік береді.
Кітапханада өткізілетін шаралар туралы
Кітапханада жаңа оқу жылында қабылданған 1-курс білім алушыларына «Кітапханаға саяхат» ұйымдастырылады. Онда кітапханамен таныстырып, кітапты пайдалану ережелері және анықтамалық басылымдармен жұмыс жасау түрлері, электрондық оқулықтарды пайдалану және кітап қорындағы жалпы пәндер және арнайы пәндер бойынша оқулықтарды іздестіруге кеңестер беріледі.Сонымен бірге, кітап қорымен, каталогтармен жұмыс, кітап көрмелерінің мазмұны, мерзімдік басылымдар туралы, кітапханаға тіркелу тәртібі, т.б. қызмет көрсету түрлерімен таныстыру жұмыстары жүргізіледі. Кітапхананың жұмыс жоспарына сәйкес оқырмандардың рухани байлықтарын әдебиет оқу арқылы жеткізу мақсатында еліміздің ақын - жазушыларының шығармаларын насихаттауда түрлі тақырыптарға арналған инновациялық- көпшілік шаралар, айтулы даталарға байланысты шаралар, жыл сайын жолданатын Елбасы Жолдауын насихаттау жұмыстары өткізіліп тұрады. Кітапханада қажетті есептеу-тіркеу және есептік құжаттанамалары жүргізіліп отырады. Кітаптар мен әдебиеттерге инвентарлық тіркеу жүргізіледі. Кітапханашылар оқу жылына жұмыс жоспарын құрастыруда оқу жоспарларын және колледждің оқу- әдістемелік, тәрбие жұмыс жоспарын басшылыққа алады және әр жарты жыл сайын кітапхана жұмысы туралы есеп беріп отырады.
Кітапханада жоспар бойынша жүргізілген көпшілік іс-шаралар
Кітапхана қызметкерлері колледждің қоғамдық өміріне белсене қатысады. Кітапханада көпшілік іс-шаралардың келесі түрлері:кітап көрмелері, ақпараттық хабарламалар, мерекелік кешке байланысты көрмелер, ақпарат сағаттары, тақырыптық көрмелер мен танымдық сағаттары және т.б. өткізіліп тұрады.
Кітапханада өткен іс-шаралар
Жаңалықтар
Ел мүддесін бәрінен биік қоятын, өзінен кейінгі ізінен ерген інілеріне ізеттігін аямайтын, ізінен ерген ұрпағына ұлылығын ұялатып, бір қауымға бас-көз бола білген қарттарымыздың орны ерекше. Олай болса, әр халықтың бойында ықылым заманнан бері қалыптасып, оны өзгелерден даралап тұратын, тек өзіне ғана тән қасиеттері болады. Біздің халқымыздың сондай ерекшеліктерінің бірі-үлкенді сыйлау, оның сөзіне құлақ асу. Қазақ қарты жасына лайық ауызы дуалы, сөзі берекелі, ісі тыңғылықты, ойы терең, ақылы телегей теңіз болып келеді. Міне, осындай теңеуге лайық қарияларды жылына бір рет келетін 1 қазан- Қарттар күніне орай колледж кітапханасында "Қарттарын қадірлеген ел ардақты" атты танымдық сағаты өтті. Шара барысында адам өмірінің мәні мен сұлулығы, оның келешегіне сенімділігі-баланың ата-анасын құрметтеп, перзенттік парызын өтеуінде екені туралы айтылып, қарттар үйі жайында бейнебаян көрсетілді, оқушылар тақырыпқа сай өлеңдер оқып, өздерін мазалаған сұрақтарына жауап ала алды.
Қазақтың біртуар ұлдарының бірі, данышпан ақын, ойшыл, дана ғұламаларының бірі, қазақ әдебиетінің шоқтығы биік ірі тұлғасы, ұлы ағартушы Абай Құнанбайұлының туғанына 175 жыл толуына орай кітапхана қызметкерлері "Ұлы халықтың-ұлы Абайы" тақырыбында әдеби- сазды кеш өткізді.Оқушылар Абайдың күйлерін тыңдап, әндерін орындады.Абайдың табиғат лирикасына арналған өлеңдерін, қара сөздерін, сонымен қатар Абай атасына еліктеген жастар өздері шығарған өлеңдерін мәнерлеп оқи білді.
Кітап-білім нәрімен сусындатар сарқылмас қазына, рухани байлықтың қайнар көзі, рух дәрумені десек, бүгінгі колледж кітапханасындағы кітап қоры жылдан-жылға толыға түсуде. Кітапхана колледжде оқытылатын мамандықтарға арналған оқулықтар мен оқу-әдістемелік құралдарымен толық қамтамасыз етілген. Жақында оқушылардың кітапқа деген қызығушылықтарын арттыру мақсатында мамандықтар бойынша түрлі көрмелер ұйымдастырылды.
Манап Көкеновтың туғанына 90 жыл толуына байланысты өткізілген «Сүлейлердің соңғы тұяғы» атты іс-шарадағы Манап Көкеновтың үлкен ұлы ҚР мәдениет қайраткері, ақын Әбдікерім Манаповпен болған сұхбат.
Дінмұхамед Ахметұлы Қонаевтың туған күніне орай өткізілген «Заманының заңғар тұлғасы» атты библиографиялық шолу.
«Ұлтты өзінің руханияты емдейді» тақырыбында өтілген танымдық іс-шара.
Ш.Құдайбердіұлының туғанына 160 жыл толуына орай өткізілген «Туғанда дүние есігін ашады өлең» тақырыбындағы поэзия кеші.
